قازاقستان, قىتاي, قىرعىزستان, ءۇندىستان, پاكىستان, رەسەي, تاجىكستان, وزبەكستان سىرتقى ىستەر مينيسترلەرى بەيجىڭدەگى وسى وتىرىستىڭ بارىسىندا شىۇ-نىڭ ساياسي, ەكونوميكالىق جانە گۋمانيتارلىق سالالارداعى الداعى مىندەتتەردى تالقىلادى, سونداي-اق تسينداو دەكلاراتسياسىنىڭ جوباسىن جانە ۇيىمنىڭ قىزمەتىنە قاتىستى باسقا دا شەشىمدەردى قاراستىردى. حالىقارالىق جانە وڭىرلىك كۇن ءتارتىبىنىڭ وزەكتى ماسەلەلەرى بويىنشا بايىپتى پىكىر الماسىلدى. 2017 جىلى ماۋسىمدا استانادا وتكەن شىۇ-نىڭ ءسامميتى بارىسىندا قول جەتكىزىلگەن ۋاعدالاستىقتاردىڭ ىسكە اسىرۋ بارىسى قاراستىرىلدى.
قازاقستان سىرتقى ىستەر ءمينيسترى قايرات ءابدىراحمانوۆ ءوز سوزىندە ازىق-ت ۇلىك قاۋىپسىزدىگىن قامتاماسىز ەتۋ, شىۇ-عا مۇشە مەملەكەتتەردىڭ كولىكتىك باعدارلارىنىڭ جان-جاققا تارماقتالعان جۇيەسىن ەسكەرە وتىرىپ, اۆتوكولىك جانە تەمىر جولداردى دامىتۋ ماسەلەسىنىڭ وزەكتىلىگىن اتاپ ءوتتى. سونىمەن قاتار قازاقستاننىڭ شىۇ-نىڭ ىسكەرلىك كەڭەسى مەن شىۇ-نىڭ بانكارالىق بىرلەستىگىنىڭ مينيسترلىك ماجىلىستەرى مەن جۇمىس توپتارىنىڭ تەتىكتەرى قامتىلعان نەعۇرلىم اۋقىمدى ىنتىماقتاستىققا جان-جاقتى قوسىلۋىن قولدايتىنىن اتاپ, ساۋدا-ەكونوميكالىق سالادا قابىلدانعان قۇجاتتاردى تۇگەندەۋدى جانە ولاردىڭ ىسكە اسىرىلۋىن قامتاماسىز ەتۋدى ۇسىندى.
وتىرىس قارساڭىندا دەلەگاتسيا باسشىلارى قىتاي حالىق رەسپۋبليكاسىنىڭ توراعاسى سي تسزينپينمەن كەزدەستى. ول قىتاي تاراپى شىۇ-نىڭ دامۋىنا جاردەم ەتۋدى ەلدىڭ سىرتقى ساياسي باسىمدىقتارىنىڭ ءبىرى رەتىندە قاراستىراتىنىن جانە ۇيىمعا باسقا مۇشە مەملەكەتتەرمەن بىرلەسە ساياسي سالادا ءوزارا قولداۋ كورسەتۋگە, وڭىردە قاۋىپسىزدىك پەن تۇراقتىلىقتى قامتاماسىز ەتۋگە, ء«بىر بەلدەۋ – ءبىر جول» باعدارلاماسى اياسىندا ىنتىماقتاستىقتى نىعايتۋعا, گۋمانيتارلىق الماسۋلاردى كەڭەيتۋگە دايىن ەكەنىن ءبىلدىردى.
جالپى, سىرتقى ساياسات ۆەدومستۆولارىنىڭ باسشىلارى شىۇ ءوزارا سەنىمدىلىككە, ءوزارا تيىمدىلىككە, تەڭدىككە, ءوزارا كونسۋلتاتسيالارعا, مادەنيەتتىڭ الۋان تۇرلىلىگىن قۇرمەتتەۋگە جانە بىرلەسىپ دامۋ ۇمتىلىسىنا سۇيەنە وتىرىپ, ءوزىن بەدەلدى حالىقارالىق ۇيىمنىڭ جاڭا ءتۇرى جانە حالىقارالىق قاتىناستار جۇيەسىنىڭ ماڭىزدى قاتىسۋشىسى رەتىندە بەكىتكەنىن ايتتى.
